جب آسمان پھٹ جائے گا،

اور جب تارے بکھر جائیں گے،

اور جب سمندر پھاڑ دیے جائیں گے، ¹

اور جب قبریں کھول دی جائیں گی، ²

اُس وقت ہر شخص کو اُس کا اگلا پچھلا سب کیا دھرا معلوم ہو جائے گا۔ ³

اے انسان، کس چیز نے تجھے اپنے اُس ربِّ کریم کی طرف سے دھوکے میں ڈال دیا

جس نے تجھے پیدا کیا، تجھے نِک سُک سے درست کیا، تجھے متناسِب بنایا،

اور جس صورت میں چاہا تجھ کو جوڑ کر تیار کیا؟ ⁴

ہر گز نہیں، ⁵ بلکہ (اصل بات یہ ہے کہ ) تم لوگ جزا و سزا کو جھُٹلاتے ہو، ⁶

حالانکہ تم پر نگراں مقرر ہیں،

ایسے معزز کاتب

جو تمہارے ہر فعل کو جانتے ہیں۔ ⁷

یقیناً نیک لوگ مزے میں ہوں گے

اور بے شک بدکار لوگ جہنّم میں جائیں گے ۔

جزا کے دن وہ اس میں داخل ہوں گے

اور اُس سے ہر گز غائب نہ ہو سکیں گے۔

اور تم کیا جانتے ہو کہ وہ جزا کا دن کیا ہے؟

ہاں، تمہیں کیا خبر کہ وہ جزا کا دن کیا ہے؟

یہ وہ دن ہے جب کسی شخص کے لیے کچھ کرنا کسی کے بس میں نہ ہوگا، ⁸ فیصلہ اُس دن بالکل اللہ کے اختیار میں ہوگا۔ ؏۱