ط۔س۔م۔

یہ کتابِ مبین کی آیات ہیں۔¹

اے محمدؐ ، شاید تم اس غم میں اپنی جان کھو دو گے کہ یہ لوگ ایمان نہیں لاتے۔²

ہم چاہیں تو آسمان سے ایسی نشانی نازل کر سکتے ہیں کہ اِن کی گردنیں اس کے آگے جُھک جائیں۔³

اِن لوگوں کے پاس رحمٰن کی طرف سے جو نئی نصیحت بھی آتی ہے یہ اس سے منہ موڑ لیتے ہیں۔

اب کہ یہ جھُٹلا چکے ہیں، عنقریب اِن کو اس چیز کی حقیقت (مختلف طریقوں سے )معلوم ہو جائے گی جس کا یہ مذاق اُڑاتے رہے ہیں۔⁴

اور کیا انہوں نے کبھی زمین پر نگاہ نہیں ڈالی کہ ہم نے کتنی کثیر مقدار میں ہر طرح کی عمدہ نباتات اس میں پیدا کی ہیں؟

یقیناً اس میں ایک نشانی ہے⁵ ، مگر ان میں سے اکثر ماننے والے نہیں۔

اور حقیقت یہ ہے کہ تیرا ربّ زبردست بھی ہے اور رحیم بھی۔ ⁶ ؏۱

اِنہیں اُس وقت کا قصہ سُناوٴ جب کہ تمہارے ربّ نے موسیٰؑ کو پکارا⁷ ”ظالم قوم کے پاس جا

۔۔۔۔ فرعون کی قوم کے پاس⁸ ۔۔۔۔ کیا وہ نہیں ڈرتے؟“⁹

اُس نے عرض کیا ”اے میرے ربّ، مجھے خوف ہے کہ وہ مجھ کو جھُٹلا دیں گے۔

میرا سینہ گھُٹتا ہے اور میری زبان نہیں چلتی۔ آپ ہارونؑ کی طرف رسالت بھیجیں۔¹⁰

اور مجھ پر اُن کے ہاں ایک جُرم کا الزام بھی ہے، اس لیے میں ڈرتا ہوں کہ وہ مجھے قتل کر دیں گے۔“¹¹

فرمایا ”ہر گز نہیں، تم دونوں جاوٴ ہماری نشانیاں لے کر¹² ، ہم تمہارے ساتھ سب کچھ سُنتے رہیں گے۔

فرعون کے پاس جاوٴ اور اس سے کہو، ہم کو ربّ العٰلمین نے بھیجا ہے

اس لیے کہ تُو بنی اسرائیل کو ہمارے ساتھ جانے دے۔“¹³

فرعون نے کہا ”کیا ہم نے تجھ کو اپنے ہاں بچہ سا نہیں پالا تھا؟ ¹⁴ تُو نے اپنی عمر کے کئی سال ہمارے ہاں گزارے،

اور اس کے بعد کر گیا جو کچھ کہ کر گیا¹⁵، تُو بڑا احسان فراموش آدمی ہے۔“

موسیٰؑ نے جواب دیا” اُس وقت وہ کام میں نے نا دانستگی میں کر دیا تھا۔¹⁶

پھر میں تمہارے خوف سے بھاگ گیا۔ اس کے بعد میرے ربّ نے مجھ کو حکم عطا کیا ¹⁷ اور مجھے رسُولوں میں شامل فرما لیا۔

رہا تیرا احسان جو تُو نے مجھ پر جتایا ہے تو اس کی حقیقت یہ ہے کہ تُو نے بنی اسرائیل کو غلام بنا لیا تھا۔“¹⁸

فرعون نے کہا¹⁹ ”اور یہ ربّ العالمین کیا ہوتا ہے؟“²⁰

موسیٰؑ نے جواب دیا ”آسمانوں اور زمین کا ربّ، اور اُن سب چیزوں کا ربّ جو آسمان و زمین کے درمیان ہیں، اگر تم یقین لانے والے ہو۔“²¹

فرعون نے اپنے گِردوپیش کے لوگوں سے کہا ”سُنتے ہو؟“

موسیٰؑ نے کہا ”تمہارا ربّ بھی اور تمہارے اُن آباوٴ اجداد کا ربّ بھی جو گزر چکے ہیں۔“²²

فرعون نے (حاضرین سے)کہا ”تمہارے یہ رسُول صاحب جو تمہاری طرف بھیجے گئے ہیں ، بالکل ہی پاگل معلوم ہوتے ہیں۔“

موسیٰؑ نے کہا ”مشرق و مغرب اور جو کچھ ان کے درمیان میں ہے سب کا ربّ، اگر آپ لوگ کچھ عقل رکھتے ہیں۔“²³

فرعون نے کہا ”اگر تُو نے میرے سوا کسی اور کو معبُود مانا تو تجھے بھی اُن لوگوں میں شامل کر دوں گا جو قید خانوں میں پڑے سڑ رہے ہیں۔“²⁴

موسیٰؑ نے کہا ”اگرچہ میں لے آوٴں تیرے سامنے ایک صریح چیز بھی؟“²⁵

فرعون نے کہا ”اچھا تو لے آ اگر تُو سچا ہے۔²⁶“

(اس کی زبان سے یہ بات نکلتے ہی) موسیٰؑ نے اپنا عصا پھینکا اور یکایک وہ ایک صریح اژدہا تھا۔²⁷

پھر اُس نے اپنا ہاتھ (بغل سے )کھینچا اور وہ سب دیکھنے والوں کے سامنے چمک رہا تھا۔²⁸ ؏۲

فرعون اپنے گردوپیش کے سرداروں سے بولا ”یہ شخص یقیناً ایک ماہر جادُوگر ہے۔

چاہتا ہے کہ اپنے جادُو کے زور سے تم کو تمہارے ملک سے نکال دے۔²⁹ اب بتاوٴ تم کیا حکم دیتے ہو؟“³⁰

انہوں نے کہا ”اسے اور اس کے بھائی کو روک لیجیے اور شہروں میں ہرکارے بھیج دیجیے

کہ ہر سیانے جادُوگر کو آپ کے پاس لے آئیں۔“

چنانچہ ایک روز مقرر وقت ³¹پر جادُو گر اکٹھے کر لیے گئے

اور لوگوں سے کہا گیا ”تم اجتماع میں چلو گے؟ ³²

شاید کہ ہم جادُوگروں کے دین ہی پر رہ جائیں اگر وہ غالب رہے۔“³³

جب جادُو گر میدان میں آئے تو انہوں نے فرعون سے کہا ”ہمیں انعام تو ملے گا اگر ہم غالب رہے؟“³⁴

اس نے کہا ”ہاں، اور تم تو اس وقت مقربّین میں شامل ہو جاوٴ گے۔“³⁵

موسیٰؑ نے کہا ”پھینکو جو تمہیں پھینکنا ہے۔“

انہوں نے فوراً اپنی رسّیاں اور لاٹھیاں پھینک دیں اور بولے ”فرعون کے اقبال سے ہم ہی غالب رہیں گے۔“ ³⁶

پھر موسیٰؑ نے اپنا عصا پھینکا تو یکایک وہ ان کے جھُوٹے کرشموں کو پڑپ کر تا چلا جا رہا تھا۔

اس پر سارے جادُوگر بے اختیار سجدے میں گر پڑے

اور بول اُٹھے کہ ”مان گئے ہم ربّ العالمین کو

۔۔۔۔ موسیٰؑ اور ہارونؑ کے ربّ کو۔“³⁷

فرعون نے کہا ”تم موسیٰؑ کی بات مان گئے قبل اس کے کہ میں تمہیں اجازت دیتا! ضرور یہ تمہارا بڑا ہے جس نے تمہیں جادُو سکھایا ہے۔³⁸ اچھا، ابھی تمہیں معلوم ہوا جاتا ہے، میں تمہارے ہاتھ پاوٴں مخالف سمتوں سے کٹواوٴں گا اور تم سب کو سُولی پر چڑھادوں گا۔“³⁹

انہوں نے جواب دیا ”کچھ پروا نہیں، ہم اپنے ربّ کے حضور پہنچ جائیں گے۔

اور ہمیں توقع ہے کہ ہمارا ربّ ہمارے گناہ معاف کر دے گا کیونکہ سب سے پہلے ہم ایمان لائے ہیں۔“⁴⁰ ؏۳

⁴¹ہم نے موسیٰؑ کو وحی بھیجی کہ ”راتوں رات میرے بندوں کو لے کر نکل جاوٴ، تمہارا پیچھا کیا جائے گا۔“⁴²

اس پر فرعون نے (فوجیں جمع کرنے کے لیے)شہروں میں نقیب بھیج دیے

(اور کہلا بھیجا)کہ ”یہ کچھ مُٹھی پھر لوگ ہیں،

اور انہوں نے ہم کو بہت ناراض کیا ہے،

اور ہم ایک ایسی جماعت ہیں جس کا شیوہ ہر وقت چوکنّا رہنا ہے۔“⁴³

اِس طرح ہم انہیں نکال لائے ان کے باغوں اور چشموں

اور خزانوں اور ان کی بہترین قیام گاہوں سے۔ ⁴⁴

یہ تو ہوا اُن کے ساتھ، اور (دُوسری طرف)بنی اسرائیل کو ہم نے ان سب چیزوں کا وارث کر دیا۔⁴⁵

صبح ہوتے یہ لوگ اُن کے تعاقب میں چل پڑے۔

جب دونوں گروہوں کا آمنا سامنا ہوا تو موسیٰؑ کے ساتھی چیخ اُٹھے کہ ”ہم تو پکڑے گئے۔“

موسیٰؑ نے کہا ”ہر گز نہیں۔ میرے ساتھ میرا ربّ ہے۔ وہ ضرور میری رہنمائی فرمائے گا۔“⁴⁶

ہم نے موسیٰؑ کو وحی کے ذریعہ سے حکم دیا کہ ”مار اپنا عصا سمندر پر۔“ یکایک سمندر پھٹ گیا اور اس کا ہر ٹکڑا ایک عظیم الشان پہاڑ کی طرح ہو گیا۔⁴⁷

اُسی جگہ ہم دُوسرے گروہ کو بھی قریب لے آئے۔⁴⁸

موسیٰؑ اور اُن سب لوگوں کو جو اس کے ساتھ تھے، ہم نے بچا لیا ،

اور دُوسروں کو غرق کر دیا۔

اس واقعہ میں ایک نشانی ہے ⁴⁹،مگر اِن لوگوں میں سے اکثر ماننے والے نہیں ہیں۔

اور حقیقت یہ ہے کہ تیرا ربّ زبر دست بھی ہے اور رحیم بھی۔ ؏۴

اور اِنہیں ابراہیمؑ کا قصہ سُناوٴ⁵⁰

جبکہ اس نے اپنے باپ اور اپنی قوم سے پُوچھا تھا کہ ”یہ کیا چیزیں ہیں جن کو تم پُوجتے ہو؟“⁵¹

انہوں نے جواب دیا ”کچھ بُت ہیں جن کی ہم پُوجا کرتے ہیں اور انہی کی سیوا میں ہم لگے رہتے ہیں۔“⁵²

اس نے پوچھا ”کیا یہ تمہاری سُنتے ہیں جب تم انہیں پکارتے ہو؟

یا یہ تمہیں کچھ نفع یا نقصان پہنچاتے ہیں؟“

انہوں نے جواب دیا ”نہیں، بلکہ ہم نے اپنے باپ دادا کو ایسا ہی کرتے پایا ہے۔“⁵³

اس پر ابراہیمؑ نے کہا ”کبھی تم نے (آنکھیں کھول کر)اُن چیزوں کو دیکھا بھی جن کی بندگی بجا لاتے رہے؟

تم اور تمہارے پچھلے باپ دادا ⁵⁴

میرے تو یہ سب دشمن ہیں⁵⁵، بجز ایک ربّ العالمین⁵⁶ کے،

جس نے مجھے پیدا کیا⁵⁷، پھر وہی میری رہنمائی فرماتا ہے۔

جو مجھے کھلاتا اور پِلاتا ہے

اور جب بیمار ہو جاتا ہوں تو وہی مجھے شفا دیتا ہے۔⁵⁸

جو مجھے موت دے گا اور پھر دوبارہ مجھ کو زندگی بخشے گا۔

اور جس سے میں اُمید رکھتا ہوں کہ روزِ جزا میں وہ میری خطا معاف فرما دے گا۔“⁵⁹

(اِس کے بعد ابراہیمؑ نے دُعا کی) ”اے میرے ربّ، مجھے حکم عطا کر۔⁶⁰ اور مجھ کو صالحوں کے ساتھ مِلا۔ ⁶¹

اور بعد کے آنے والوں میں مجھ کو سچی ناموری عطا کر۔ ⁶²

اور مجھے جنّتِ نعیم کے وارثوں میں شامل فرما۔

اور میرے باپ کو معاف کر دے کہ بے شک وہ گمراہ لوگوں میں سے ہے⁶³

اور مجھے اُس دن رُسوا نہ کر جبکہ سب لوگ زندہ کر کے اُٹھائے جائیں گے ⁶⁴

جبکہ نہ مال کوئی فائدہ دے گا نہ اولاد،

بجز اس کے کہ کوئی شخص قلبِ سلیم لیے ہوئے اللہ کے حضور حاضر ہو۔“⁶⁵

۔۔۔۔(اُس روز⁶⁶ )جنّت پرہیز گاروں کے قریب لے آئی جائے گی۔

اور دوزخ بہکے ہوئے لوگوں کے سامنے کھول دی جائے گی ⁶⁷

اور ان سے پوچھا جائے گا کہ ”اب کہاں ہیں وہ جن کی تم عبادت کرتے تھے؟

خدا کو چھوڑ کر، کیا وہ تمہاری کچھ مدد کر رہے ہیں یا خود اپنا بچاوٴ کر سکتے ہیں؟“

پھر وہ معبُود اور یہ بہکے ہوئے لوگ اس میں اُوپر تلے دھکیل دیے جائیں گے۔،

اور ابلیس کے لشکر سب کے سب ⁶⁸

وہاں یہ سب آپس میں جھگڑیں گے اور یہ بہکے ہوئے لوگ (اپنے معبُودوں سے)کہیں گے

کہ ”خدا کی قسم، ہم تو صریح گمراہی میں مبتلا تھے

جبکہ تم کو ربّ العالمین کی برابری کا درجہ دے رہے تھے ۔

اور وہ مجرم لوگ ہی تھے جنہوں نے ہم کو اس گمراہی میں ڈالا۔ ⁶⁹

اب نہ ہمارا کوئی سفارشی ہے⁷⁰

اور نہ کوئی جگری دوست۔ ⁷¹

کاش ہمیں ایک دفعہ پھر پلٹنے کا موقع مل جائے تو ہم مومن ہوں۔“⁷²

یقیناً اس میں ایک بڑی نشانی ہے⁷³ ، مگر ان میں سے اکثر لوگ ایمان لانے والے نہیں ۔

اور حقیقت یہ ہے کہ تیرا ربّ زبردست بھی ہے اور رحیم بھی۔ ؏ ۵

⁷⁴ قومِ نوحؑ نے رسُولوں کو جھُٹلایا۔⁷⁵

یاد کرو جبکہ اُن کے بھائی نوحؑ نے ان سے کہا تھا ”کیا تم ڈرتے نہیں ہو؟⁷⁶

میں تمہارے لیے ایک امانت دار رسُول ہوں⁷⁷،

لہٰذا تم اللہ سے ڈرو اور میری اطاعت کرو۔ ⁷⁸

میں اس کام پر تم سے کسی اجر کا طالب نہیں ہوں۔ میرا اجر تو ربّ العالمین کے ذمّہ ہے۔⁷⁹

پس تم اللہ سے ڈرو اور (بے کھٹکے)میری اطاعت کرو۔“ ⁸⁰

انہوں نے جواب دیا ”کیا ہم تجھے مان لیں حالانکہ تیری پیروی رذیل ترین لوگوں نے اختیار کی ہے؟“⁸¹

نُوحؑ نے کہا ”میں کیا جانوں کہ ان کے عمل کیسے ہیں،

ان کا حساب تو میرے ربّ کے ذمّہ ہے، کاش تم کچھ شعور سے کام لو۔⁸²

میرا یہ کام نہیں ہے کہ جو ایمان لائیں ان کو میں دھتکار دوں۔

میں تو بس ایک صاف صاف متنبّہ کر دینے والا آدمی ہوں۔“ ⁸³

انہوں نے کہا ”اے نُوحؑ ، اگر تُو باز نہ آیا تو پھِٹکارے ہوئے لوگوں میں شامل ہو کر رہے گا۔“⁸⁴

نُوحؑ نے دُعا کی ”اے میرے ربّ، میری قوم نے مجھے جھُٹلا دیا۔⁸⁵

اب میرے اور ان کے درمیان دو ٹوک فیصلہ کر دے اور مجھے اور جو مومن میرے ساتھ ہیں ان کو نجات دے۔“⁸⁶

آخر کار ہم نے اس کو اور اس کے ساتھیوں کو ایک بھری ہوئی کشتی میں بچا لیا۔⁸⁷

اور اس کے بعد باقی لوگوں کو غرق کر دیا۔

یقیناً اس میں ایک نشانی ہے ، مگر ان میں سے اکثر لوگ ماننے والے نہیں۔

اور حقیقت یہ ہے کہ تیرا ربّ زبر دست بھی ہے اور رحیم بھی۔ ؏۶

عاد نے رسُولوں کو جھُٹلایا۔⁸⁸

یاد کرو جبکہ ان کے بھائی ہُودؑ نے اُن سے کہا تھا ”⁸⁹کیا تم ڈرتے نہیں؟

میں تمہارے لیے ایک امانت دار رسُول ہوں۔

لہٰذا تم اللہ سے ڈرو اور میری اطاعت کرو۔

میں اس کام پر تم سے کسی اجر کا طالب نہیں ہوں۔ میرا اجر تو ربّ العالمین کے ذمّہ ہے۔

یہ تمہارا کیا حال ہے کہ ہر اُونچے مقام پر لاحاصل ایک یادگار عمارت بنا ڈالتے ہو⁹⁰،

اور بڑے بڑے قصر تعمیر کرتے ہو گویا تمہیں ہمیشہ رہنا ہے۔⁹¹

اور جب کسی پر ہاتھ ڈالتے ہو جبّار بن کر ڈالتے ہو۔ ⁹²

پس تم لوگ اللہ سے ڈرو اور میری اطاعت کرو۔

ڈرو اُس سے جس نے وہ کچھ تمہیں دیا ہے جو تم جانتے ہو۔

تمہیں جانور دیے، اولادیں دیں،

باغ دیے اور چشمے دیے۔

مجھے تمہارے حق میں ایک بڑے دن کے عذاب کا ڈر ہے۔“

انہوں نے جواب دیا ”تُو نصیحت کر یا نہ کر، ہمارے لیے سب یکساں ہے۔

یہ باتیں تو یونہی ہوتی چلی آئی ہیں۔⁹³

اور ہم عذاب میں مبتلا ہونے والے نہیں ہیں۔“

آخر کار انہوں نے اُسے جھُٹلا دیا اور ہم نے ان کو ہلاک کر دیا۔⁹⁴، یقیناً اس میں ایک نشانی ہے، مگر ان میں سے اکثر لوگ ماننے والے نہیں ہیں۔

اور حقیقت یہ ہے کہ تیرا ربّ زبر دست بھی ہے اور رحیم بھی۔ ؏۷

ثمود نے رسُولوں کو جھُٹلایا۔ ⁹⁵

یاد کرو جبکہ ان کے بھائی صالحؑ نے ان سے کہا ”کیا تم ڈرتے نہیں؟

میں تمہارے لیے ایک امانت دار رسُول ہوں۔⁹⁶

لہٰذا تم اللہ سے ڈرو اور میری اطاعت کرو۔

میں اس کام پر تم سے کسی اجر کا طالب نہیں ہوں، میرا اجر تو ربّ العالمین کے ذمّہ ہے۔

کیا تم اُن سب چیزوں کے درمیان ، جو یہاں ہیں ، بس یوں ہی اطمینان سے رہنے دیے جاوٴ گے؟ ⁹⁷

ان باغوں اور چشموں میں؟

اِن کھیتوں اور نخلستانوں میں جن کے خوشے رس بھرے ہیں؟⁹⁸

تم پہاڑ کھود کھود کر فخریہ اُن میں عمارتیں بناتے ہو۔⁹⁹

اللہ سے ڈرو اور میری اطاعت کرو۔

اُن بے لگام لوگوں کی اطاعت نہ کرو

جو زمین میں فساد برپا کرتے ہیں اور کوئی اصلاح نہیں کرتے۔“¹⁰⁰

اُنہوں نے جواب دیا ”تُو محض ایک سحر زدہ آدمی ہے۔¹⁰¹

تُو ہم جیسے ایک انسان کے سوا اور کیا ہے۔ لا کوئی نشانی اگر تُو سچا ہے۔“¹⁰²

صالح نے کہا ”یہ اُونٹنی ہے۔¹⁰³ ایک دن اس کے پینے کا ہے اور ایک دن تم سب کے پانی لینے کا۔ ¹⁰⁴

اس کو ہرگز نہ چھیڑنا ورنہ ایک بڑے دن کا عذاب تم کو آلے گا۔“

مگر انہوں نے اس کی کوچیں کاٹ دیں¹⁰⁵ اور آخر کار پچھتاتے رہ گئے۔

عذاب نے انہیں آلیا۔¹⁰⁶ یقیناً اس میں ایک نشانی ہے ، مگر ان میں سے اکثر ماننے والے نہیں۔

اور حقیقت یہ ہے کہ تیرا ربّ زبردست بھی ہے اور رحیم بھی۔ ؏۸

لُوطؑ کی قوم نے رسُولوں کو جھُٹلایا۔ ¹⁰⁷

یاد کرو جبکہ ان کے بھائی لُوطؑ نے ان سے کہا تھا ”کیا تم ڈرتے نہیں؟

میں تمہارے لیے ایک امانت دار رسُول ہوں۔

لہٰذا تم اللہ سے ڈرو اور میری اطاعت کرو۔

میں اس کام پر تم سے کسی اجر کا طالب نہیں ہوں، میرا اجر تو ربّ العالمین کے ذمّہ ہے۔

کیا تم دنیا کی مخلوق میں سے مردوں کے پاس جاتے ہو¹⁰⁸

اور تمہاری بیویوں میں تمہارے ربّ نے تمہارے لیے جو کچھ پیدا کیا ہے اسے چھوڑ دیتے ہو؟¹⁰⁹ بلکہ تم لوگ تو حد سے ہی گزر گئے ہو۔“¹¹⁰

انہوں نے کہا ”اے لُوطؑ ، اگر تُو اِن باتوں سے باز نہ آیا تو جو لوگ ہماری بستیوں سے نکالے گئے ہیں اُن میں تُو بھی شامل ہو کر رہے گا۔“¹¹¹

اس نے کہا ”تمہارے کرتُوتوں پر جو لوگ کُڑھ رہے ہیں میں اُن میں شامل ہوں۔

اے پروردگار، مجھے اور میرے اہل و عیال کو ان کی بد کرداریوں سے نجات دے۔“¹¹²

آخر کار ہم نے اسے اور اس کے سب اہل و عیال کو بچا لیا،

بجز ایک بُڑھیا کے جو پیچھے رہ جانے والوں میں تھی۔ ¹¹³

پھر باقی ماندہ لوگوں کو ہم نے تباہ کر دیا

اور ان پر برسائی ایک برسات، بڑی ہی بُری بارش تھی جو اُن ڈرائے جانے والوں پر نازل ہوئی۔¹¹⁴

یقیناً اس میں ایک نشانی ہے ، مگر اِن میں سے اکثر ماننے والے نہیں۔

اور حقیقت یہ ہے کہ تیرا ربّ زبر دست بھی ہے اور رحیم بھی۔ ؏۹

اصحابُ الایکہ نے رسُولوں کو جھُٹلایا۔ ¹¹⁵

یاد کرو جبکہ شعیبؑ نے ان سے کہا تھا ”کیا تم ڈرتے نہیں؟

میں تمہارے لیے ایک امانت دار رسُول ہوں۔

لہٰذا تم اللہ سے ڈرو اور میری اطاعت کرو۔

میں اس کام پر تم سے کسی اجر کا طالب نہیں ہوں۔ میرا اجر تو ربّ العالمین کے ذمّہ ہے ۔

پیمانے ٹھیک بھرو اور کسی کو گھاٹا نہ دو۔

صحیح ترازو سے تولو

اور لوگوں کو ان کی چیزیں کم نہ دو۔ زمین میں فساد نہ پھیلاتے پھرو

اور اُس ذات کا خوف کرو جس نے تمہیں اور گزشتہ نسلوں کو پیدا کیا ہے۔“

انہوں نے کہا ”تُو محض ایک سحر زدہ آدمی ہے،

اور تُو کچھ نہیں ہے مگر ایک انسان ہم ہی جیسا ، اور ہم تو تجھے بالکل جھُوٹا سمجھتے ہیں۔

اگر تُو سچا ہے تو ہم پر آسمان کا کوئی ٹکڑا گرا دے۔“

شعیبؑ نے کہا ”میرا ربّ جانتا ہے جو کچھ تم کر رہے ہو۔“¹¹⁶

انہوں نے اُسے جھُٹلا دیا، آخر کار چھتری والے دن کا عذاب ان پر آگیا¹¹⁷ ، اور وہ بڑے ہی خوفناک دن کا عذاب تھا۔

یقیناً اس میں ایک نشانی ہے ، مگر ان میں سے اکثر ماننے والے نہیں۔

اور حقیقت یہ ہے کہ تیرا ربّ زبردست بھی ہے اور رحیم بھی۔ ؏۱۰

¹¹⁸ یہ ربّ العالمین کی نازل کردہ چیز ہے۔¹¹⁹

اسے لے کر امانت دار رُوح ¹²⁰ اُتری ہے

تیرے دل پر، تاکہ تُو اُن لوگوں میں شامل ہو جو (خدا کی طرف سے خلقِ خدا کو)متنبّہ کرنے والے ہیں،

صاف صاف عربی زبان میں۔ ¹²¹

اور اگلے لوگوں کی کتابوں میں بھی یہ موجود ہے۔ ¹²²

کیا اِن (اہلِ مکّہ) کے لیے یہ کوئی نشانی نہیں ہے کہ اِسے علماءِ بنی اسرائیل جانتے ہیں؟ ¹²³

(لیکن اِن کی ہٹ دھرمی کا حال تو یہ ہے کہ)اگر ہم اسے کسی عجمی پر بھی نازل کر دیتے

اور یہ (فصیح عربی کلام)وہ ان کو پڑھ کر سُناتا تب بھی یہ مان کر نہ دیتے۔ ¹²⁴

اِسی طرح ہم نے اس (ذکر)کو مجرموں کے دلوں میں گزارا ہے۔ ¹²⁵

وہ اس پر ایمان نہیں لاتے جب تک کہ عذاب الِیم نہ دیکھ لیں۔ ¹²⁶

پھر جب وہ بے خبری میں ان پر آپڑتا ہے

اُس وقت وہ کہتے ہیں کہ ”کیا اب ہمیں کچھ مہلت مِل سکتی ہے؟“ ¹²⁷

تو کیا یہ لوگ ہمارے عذاب کے لیے جلدی مچا رہے ہیں؟

تم نے کچھ غور کیا ، اگر ہم انہیں برسوں تک عیش کرنے کی مہلت بھی دے دیں

اور پھر وہی چیز ان پر آجائے جس سے انہیں ڈرایا جا رہا ہے

تو وہ سامانِ زیست جو ان کو ملا ہوا ہے اِن کے کس کام آئے گا؟ ¹²⁸

(دیکھو)ہم نے کبھی کسی بستی کو اِس کے بغیر ہلاک نہیں کیا کہ اُس کے لیے خبردار کرنے والے موجود تھے۔

حقِّ نصیحت ادا کرنے کو اور ہم ظالم نہ تھے۔ ¹²⁹

اِس (کتابِ مبین)کو شیاطین لے کر نہیں اُترے ہیں، ¹³⁰

نہ یہ کام ان کو سجتا ہے ¹³¹ ، اور نہ وہ ایسا کر ہی سکتے ہیں۔ ¹³²

وہ تو اس کی سماعت تک سے دُور رکھے گئے ہیں۔ ¹³³

پس اے محمدؐ ، اللہ کے ساتھ کسی دُوسرے معبُود کو نہ پکارو، ورنہ تم بھی سزا پانے والوں میں شامل ہو جاوٴ گے۔ ¹³⁴

اپنے قریب ترین رشتہ داروں کو ڈراوٴ، ¹³⁵

اور ایمان لانے والوں میں سے جو لوگ تمہاری پیروی اختیار کریں ان کے ساتھ تواضع سے پیش آوٴ،

لیکن اگر وہ تمہاری نافرمانی کریں تو ان سے کہہ دو کہ جو کچھ تم کرتے ہو اس سے میں بری الذّمّہ ہوں۔ ¹³⁶

اور اُس زبر دست اور رحیم پر توکّل کرو ¹³⁷

جو تمہیں اُس وقت دیکھ رہا ہوتا ہے جب تم اُٹھتے ہو ¹³⁸ ،

اور سجدہ گزار لوگوں میں تمہاری نقل و حرکت پر نگاہ رکھتا ہے۔ ¹³⁹

وہ سب کچھ سُننے اور جاننے والا ہے۔

لوگو، کیا میں تمہیں بتاوٴں کہ شیاطین کس پر اُترا کرتے ہیں؟

وہ ہر جعل ساز بدکار پر اُترا کرتے ہیں۔ ¹⁴⁰

سُنی سُنائی باتیں کانوں میں پھُونکتے ہیں اور ان میں سے اکثر جھُوٹے ہوتے ہیں۔ ¹⁴¹

رہے شعراء، تو ان کے پیچھے بہکے ہوئے لوگ چلا کرتے ہیں۔ ¹⁴²

کیا تم دیکھتے نہیں ہو کہ وہ ہر وادی میں بھٹکتے ہیں ¹⁴³

اور ایسی باتیں کہتے ہیں جو کرتے نہیں ہیں ¹⁴⁴

۔۔۔۔ بجز اُن لوگوں کے جو ایمان لائے اور جنہوں نے نیک عمل کیے اور اللہ کو کثرت سے یاد کیا، اور جب ان پر ظلم کیا گیا تو صرف بدلہ لے لیا ¹⁴⁵ ۔۔۔۔ اور ظلم کرنے والوں کو عنقریب معلوم ہو جائے گا کہ وہ کس انجام سے دوچار ہوتے ہیں۔ ¹⁴⁶ ؏۱۱